Tuesday, 18 March 2014

மரபுவழி சுண்ணாம்பு சாந்தில் நவீன தொழில்நுட்பம்

-வெள் உவன்


                       தமிழ் நாட்டில் கருங்கல் கட்டடங்களுக்கு முன்னர்ச் செங்கல் கட்டடங்கள் இருந்துள்ளன. ஏழாம் நூற்றாண்டுக் கருங்கல் கட்டடங்கள் அதற்கு முன் இருந்த செங்கல் கட்டடங்களின் மாதிரிகள் தான் என்பதில் ஐயமில்லை.அந்த வகையில் மாமல்லையில் உள்ள கூரை குறிப்பிடத்தக்கது. இது போன்ற கூரைகள் தமிழ் நாட்டில் ஏராளமாக காணப்படுகின்றன. கூரையில் செடி, கொடிகள் முளைக்காமல் பார்த்துக் கொண்டால் இது பல நூறு ஆண்டுகள் திடமாக இருக்கும். கருங்கல் சுவருக்கு அதன் மேல் சுண்ணாம்புக் காரையால் பூச வேண்டிய தேவை இல்லை. ஆனால் செங்கல் சுவர்களுக்கு சுண்ணாம்பு பூச்சு பூசுவது இன்றியமையாதது. சுண்ணாம்புடன் மணல் கலந்து அதனைக் காரை ஆலையில் அரைப்பர். 50 ஆண்டுகளுக்கு முன்பு வரை கூட நடைமுறையில் இருந்து வந்த இந்த முறை சிமெண்டின் வருகையால் வழக்கொழிந்து விட்டது. அரைத்த சுண்ணாம்புக் காரை சில நாள் புளிக்க வைக்கப்பட்டு பின்னரே பயன் படுத்தப்படும். இவ்வாறு அரைக்கப்படும் சுண்ணாம்பு காரை ஆலையின் சுற்றுகளின் எண்ணிக்கைக்கேற்ப அரைத்தீர்வை, முக்காத்தீர்வை, முழுத்தீர்வை என மூன்று வகைப்படும். முழுத்தீர்வை காரையில் மணல் முழுமையாக அரைப்பட்டிருக்கும். சுண்ணாம்பு, பசைத் தன்மையும் பிடிப்புத் தன்மையும் அதிகம் கொண்டது.  

அதனுடன் கடுக்காய் நீர், பதநீர், அல்லது சர்க்கரை நீர் கலந்து காரை தயாரித்தால் அதன் பிடிப்புத் தன்மை அதிகமாகும். சுண்ணாம்பு காலப்போக்கில் காற்றிலுள்ள கரியமில வாயுவை உட்கொண்டு மிகவும் கெட்டியாகிறது என்பதை இன்றைய அறிவியல் உலகம் இப்போது தான் கண்டறிந்துள்ளது ஆனால் இந்த அறிவியல் உண்மையை பல ஆண்டுகளுக்கு முன்பே நம் முன்னோர்கள் தெரிந்து வைத்திருந்தனர். இவ்வாறு காரை செக்கிலோ சுண்ணாம்பு அரவை அம்மியிலோ அரைத்துத் தயாரிக்கப்படுகிற சுண்ணாம்பு சாந்தையே சுதை சிற்பங்களை உருவாக்கப் பயன்படுத்தி வந்தனர் 


நமது சிற்பிகள். கோயில் கோபுரங்களில் சுதை உருவங்களை உருவாக்க இன்றும் இந்த முறையில் தான் சுண்ணாம்பு சாந்தை தயாரிக்கிறார்கள். 

இன்றைய சிற்பிகள் பண்டைய முறையில் சுண்ணாம்பு சாத்தை உருவாக்க நவீன தொழில் நுட்பங்களை பயன்படுத்தி வருகின்றனர்.  சுண்ணாம்பு அரைக்க நவீன இட்லி கிரைண்டரை பயன்படுத்த தொடங்கி இருக்கின்றனர். ஆனால் கலவை முறையில் எந்த மாற்றமும் இல்லாமல் கருப்பட்டி, கடுக்காய் நீர், புளிக்க வைத்தல் போன்ற பழைய முறையினை தொடர்ந்து பின் பற்றி வருகின்றனர்.

1 comment:

  1. Remba Arbuthana katturai!!!!!!!!!!!!!!!!!!!!!!!!!!!!!.super ungalai thorabu kolla ungal mobile ennai ennudaiya email ikku anuppa mudiyuma . palanisamybalan@gmail.com

    ReplyDelete